Get Even More Visitors To Your Blog, Upgrade To A Business Listing >>

Amwe mu mateka y’umunyabigwi muri Rumba Mbilia Bel ugiye gutaramira muri Kigali Jazz Junction

M’bilia Bel ukomoka Muri Repubulika Iharanira Demokarasi ya Kongo, ni umwe mu bagore bafite izina rikomeye mu muziki wa Afurika.

Abakundaga gucinya akadiho mu bihe bya kera ntawe utaramenye ibihangano by’umugore wo muri RDC wubatse amateka mu njyana ya Rumba kugeza aho bamutaziriye umwamikazi wayo muri icyo gihugu no hanze yacyo.

Kuva mu 1981, abakunze Rumba bazi M’bilia Bel mu ndirimbo zirimo Nakei Nairobi, Mpeve Ya Longo, Eswi Yo Wapi, Faux Pas, Loyenghe, Ba Gerants Ya Mabala, Cadence Mudanda, Boya Ye, Beyanga, Contre Ma Volonte, Phénomène, Bameli Soy, Désolée n’izindi nyinshi.

Uyu mugore w’imyaka 59 ni umunyabigwi ukomeye wazamuye ibendera ry’umuziki we muri Afurika bikanahesha ishema RDC akomokamo.

.Amateka ya Mbilia Bel 

M’bilia Bel yatangiye kumenyekana ubwo uwitwa Sam Manguana yavumburaga impano ye yihariye mu kugorora ijwi rya Soprano.

Guhera mu 1980 yaje kwisunga itsinda ry’abanyamuziki rya Tabu-ley Rochereau baje no kubana nk’umugabo n’umugore. Indirimbo yatumye agira igikundiro ku rwego ruhambaye ni iyo yashyize hanze mu 1981 yitwa “Mpeve Ya Longo” bishatse kuvuga umwuka wera.

Muri iyi ndirimbo yakunzwe n’abatari bake yavugaga ku mugore watawe n’umugabo akarera abana wenyine mu buzima bugoranye.

Mu 1985 abisabwe n’umugabo we Tabu-ley yaje gufata akaruhuko k’umwaka kubera gutwita yongera kugaruka mu muziki amaze kwibaruka.

Mu 1988 yashyize hanze album ye ya nyuma ari kumwe na Tabu-ley wari usanzwe ari umugabo we n’umujyanama mu bya muzika anahita ajya kuba i Paris mu Bufaransa.

Hagati yo mu 1989-1990 ubwo yari amaze kuba umuhanzi wikorera ku giti cye mu buryo bweruye, yahise atangira gukorana na Rigo Star Bamundele wari umuhanga mu gukirigita gitari bakora ibitaramo bizenguruka USA, u Burayi ndetse na Afurika y’Iburengerazuba.

Ahuje ubuhanga bwe muri Soprano, ubushongore, n’ababyinnyi ba kabuhariwe nawe yanyuzagamo agafasha ndetse n’imbaraga nyinshi yakoreshaga ku rubyiniro yatangiye kwigarurira abatuye Afurika bose ndetse no hanze yayo.

Yaje yunga mu ry’Umunyafuri y’Epfo, Miriam Makeba, wamenyekanye cyane nka Mama Afrika mu 1960 kuzamura, gusa M’bilia Bel we yaje ari kaburiwe ndetse bamwirahiraga bavugaga ko arusha kure igikundiro n’uburyo bw’imiririmbire Makeba.

M’bilia Bel afite album zigera kuri 18, yashyize hanze guhera mu 1982 kugeza ku yo aherutse mu 2014 yise ‘Pantheon’.

Abategura igitaramo cya Kigali Jazz Junction bagiye kumuzana i Kigali mu gitaramo gikomeye kizaba ku wa 7 Ukuboza 2018 muri Serena Hotel

The post Amwe mu mateka y’umunyabigwi muri Rumba Mbilia Bel ugiye gutaramira muri Kigali Jazz Junction appeared first on Touchrwanda.com.



This post first appeared on Rwanda Entertainment News - Touchrwanda.com, please read the originial post: here

Share the post

Amwe mu mateka y’umunyabigwi muri Rumba Mbilia Bel ugiye gutaramira muri Kigali Jazz Junction

×

Subscribe to Rwanda Entertainment News - Touchrwanda.com

Get updates delivered right to your inbox!

Thank you for your subscription

×