Suno Tumse Kuch Kehna hai,
Bolo tum sunogi kya…?
Apni ye puri zindagi,
Mere saath adhi baantogi kya…?

Mai jab ghar thak kar laut aaon,
Tum paani ka glass liye muskurahna,

Jo tum thak kar lautogi ghar,
Sar ko daba kar tumhari saari uljhano ko durr bhagaunga,
Jo dhoop ke chhale lagenge pair par,
Tumhare liye saare ghaav seh lunga has kar…

Jo thokre milengi zindagi me,
Haath tum tab bhi thame rakhogi kya…?
Sikhwe gile bohot honge hamare darmiyaan,
Tum tab bhi saath banaye rakhogi kya…?

Kaamon ko adha adha baant liya karenge,
Bartan mai dho dunga aur khana tum bana dena,

Chai ke deewane hai hum,
Meethas bhar denge tumhari zindagi me,
Jo dukh ke kaante chubenge,
Tum halki si phuk ki marham laga dena…

Log aankhon me doob jaate hai,
Tum aankhon ke kinaare par ruke rehna,
Jab kabhi nami bharegi meri aankhon me,
Toh unhe apne palkon me saja lunga…

Photo by saikat ghosh:

Waada nahi karunga hamesha saath rehne ka,
Bus tum Chaand bane rehna mai sitare ke tarah maujood rahunga,
Mai kabhi na bhi dikhun toh bura na manna,
Bus meri maujoodgi katum ehsaas kar lena…

Zindagi kabhi khatti toh teekhi lagegi,
Tum muskaan ki meethas bhar jaana,
Jo purane zakham khulenge,
Unpar tum dawa ban jaana…

Jab raaston me galtiyaan nahi hogi,
Toh beshak badal lena manzil,
Jo hum par aitbaar na rahe,
Toh beshak tod lena dil ke dhaage…

Kabhi aise hi chalte chale lambe safar kar lenge,
Haathon me haath dal kar Dil ki har baat keh lenge…

Aankhon me sharartein hongi,
Dil me kayi fariyaad hogi,
Kuch adhure tumhare khwaab honge,
Toh kuch bikhre panne hamare honge…

Kadi dhoop ko hum adha adha seh lenge,
Hum saari zindagi jaisa tum chaho waise reh lenge,
Sardiyon ki raaton me butte kha lenge,
Hum thodi thodi baatein aankhon se kar lenge…

Panno pe hum tumhare lafz bikher denge,
Pyaari mohtarma hum tumhari har khamoshi padh lenge…

Chaand se bhi hum thodi dooriyaan kar lenge,
Tum kaho toh hum aankhein bhi band kar lenge…

Sitaaron ke tarah tumhari zindagi jagmaga denge,
Tum chaho toh hum jugnu bhi ban jayenge…

Bus rishta Dil se nibhana,
Aur bharosa kabhi tutne na dena,
Ye Dil thoda kamzor hai mehbooba,
Ek baar tut jaane se dubara darwaze nahi kholta…

Humein sambhal ke zara tum karch karna,
Zara se kho gaye agar hum toh fir kaha dikhna…

Tumse hi toh hamari pehchaan hai dilruba,
Jo tum na milo toh har lafz bhi benaam sa hai…

Zindagi ke 2 pahiye jaise rehna,
Na zarurat se kam na zarurat jyada chahana…

Suno tumse Kuch Kehna Hai,

Written by Aamina Khan

The post Suno Tumse Kuch Kehna Hai appeared first on Heartsaysalot.