عادل الحلبي يكتب : نشرة أخبار رابعة
بقلم - عادل الحلبي
ثوار يا أحرار
يامكملين المشوار
قطعتوا ليه الصوت عندكم
وطفيتم الأنوار ؟
ولا عودنا سامعين منكم
كلمة آمين
اللي كانت بتجلجل كل
جدران البيوت
فى دعا القنوت
وتحيل ظلام الليل نهار
*****
أية الحكاية
طمنونا خبرونا عنكم
وصل لفين الأنتصار ؟
أكيد ع الأبواب
والدنيا بكرة راح تروق
وها يتقهر كل الحِواة
ويعودوا من تاني
بحَيّاتهم أكيد للشقوق
إنما الوقتي ياريت
طمنونا عن اللي فوق
وعن العصابة
وعن الديابة
و عن الـحمـــار
وراحوا فين الغلابة
راحوا فين ؟
قـفشــوهم
عن أبوهم
ولا فروا من الحِصار
ولسه رابعة لكل حر
جامع ودار
وزي ماكانت مطار ؟
*****
بس لية .. سكت ليه ؟
صوت الشباب اللى كان دايماً
يزقزق في الفضا
ويرجع لنا صوت الصدى
يفتح عليه فجر النهار ؟
ياناس ياهووووووة
ماعرفش لية قلبنا مقبوض
وحاسين بالقلق
هى الارادة لسة فيكوا بتتسرق ؟
ياهل ترى الطيارات لسه بتحدف
عليكوا روزم ورق ؟
ماتقلقوش ..
بكرة يجيكم الف عيد
الله يسهل أموركوا
ويقرب اللي كمان بعيد
والحالة تبقى
مقطقطة ومزقططة
*****
أما عن أخبارنا ليكم
أحنا هنا مخنوقين
حر ورطوبة وغرقانين
في بحر هايج من العرق
والريحة فينا مقيحة
وكل حاجة ملخبطة
حاسين ببلوة مسيحة
وخرطة طريق مشخبطة
كأنها لسة يادوب بتترسم
حد سامع لينا صوت
احنا اتعمينا ولا أنطرشنا
ولا احنا فين ؟
ولا سرح بينا المكان ؟
*****
يا طفل يا معتصم
ياللي مولود بالميدان
يا بــــــلال يا عــــــمار
ياعرايس السماء
أسماء ياصفية يا حبيبة
فين ولاد مصر الشُداد
اللي اقل ضُفر فيهم
وسام يـِزِين الجبين
وتاج لأعلى أعلى راس ؟
فين راحوا الطيبين
اللى تراب المداس
يتاقل بدهب وماس ؟
ماتقولوش ان الكتاف
تعبت من الشيلة
ماتقولوش ان الهتاف
مابقاش وسيلة
سمعونا وحيات حبيبنا النبي
هيلا هيلا هيلا
زي ما جدودنا غنوها زمان
احنا هنا عايشين هنا
على حسكم
وحشنا صوت الالتراس
وتكبيرات الحماس
والتواشيح والاذان
والصلاة وترتيل الطبيب عباس
وكأن اللي بينا وبينكم
مش شهر أو شهرين
دي كأنها ..
عِشرة سنين
كل يوم متوحشين حِسِكم
ملينا من طول ساعات الإنتظار
*****
قولوا لنا ليه الميدان
لحظة سِكِت ؟
وليه عيونا غصب عنا ليه بكت ؟
كأن مابقاش الميدان فيه الونس
وكأن ماعاد فيه شهقة نفس
ولا شقشقة عصفور
وآخر حاجة فاكرينها
سمعنا صوت بيتصربع
وحد من عندكم
كأنه لابس بيادة
فجر يوم الأربع
شد فيشة النور
لكننا والأكادة ..
إننا شامين
ريحة نسيم وياسمين
وسحاب وزخات من عطور
بالله عليكم خبرونا
تكونش القيامة ياناس
قامت خلاص
واننا في مرحلة بعث ونشور
وانتهى يوم الحساب
وربنا قضى ما بين العباد
وفوزتوا بالفردوس
وأحنا هنا محبوسين بنقضي
فترة عذاب
أو ربما إننا عايشين كابوس
*****
ياقناة الحوار
ياجزيرة يا شراع
كدا وافيناكم بموجز آخر الأخبار
كان معاكم ع الهوا
المراســل الصحـــفي
المخطوف الذهني
من على بُعد ييجي قد 60 دراع
داخل الكورة الأرضية
اللي تحت منصة
رابعة العدوية
وشكراً جزيلاً لحُسن الإستماع
