त्यामुळे मूर्तीची अवस्था थोडी खराब झालेली आहे. तसेच मंदिराच्या आवारामध्ये आपल्याला 'शिव-पार्वती' यांची देखील मूर्ती पहायला मिळते. बहुधा ही शिव-पार्वतीची मूर्ती ही मंदिराच्या देवकोष्ठामध्ये बसवलेली असावी असे वाटते. मंदिराच्या परीसरामध्ये जिथे वीरगळ सतीशिळा आणि इतर मूर्ती ठेवलेल्या आहेत तिथे एक गद्धेगाळ देखील पहायला मिळतो परंतु त्याच्यावर शिलालेख दिसून येत नाही. देवखोल येथील गद्धेगाळ याचा वरचा भाग दिवेआगर येथे सापडलेल्या तिसऱ्या गद्धेगाळ प्रमाणेच आहे. फक्त फरक एवढाच आहे कि देवखोल येथील गद्धेगाळ हा दिवेआगर येथील गद्धेगाळापेक्षा जास्त मोठा आहे. देवखोल येथील गद्धेगाळाचा मधील भाग पूर्ण सपाट असून तेथे कोणतेही शिलालेख आढळून येत नाही. तसेच या गद्धेगाळामध्ये खालच्या भागामध्ये जी स्त्रीची गाढवाशी संकर करताना आकृती कोरलेली आहे ती उजवीकडे कोरलेली असून तीचे तोंड आपल्याला गाढवाकडे आहे असे दिसते. तसेच मंदिर परिसरात आपल्याला नवनाथांच्यामूर्ती देखील बघायला मिळतात.

'कुसुमेश्वर' मंदिराची नव्याने रचना करण्याचे काम हे १९८१ साली सुरु झाले होते. नव्याने जीर्णोद्धार झालेले 'कुसुमेश्वर' मंदिर हे साधारणपणे १० ते १५ वर्षापूर्वी पूर्ण झाले. 'कुसुमेश्वर' मंदिराची रचना बघता मंदिराला सभामंडप आणि गर्भगृह पहावयास मिळते. मंदिराच्या द्वारशाखेवर गणपती उत्कृष्ट रीतीने कोरलेला आहे. तसेच सभामंडपामध्ये एका प्राचीन मूर्तीच्या पिठावर नवीन नंदी बसवलेला आपल्याला पहायला मिळतो. मंदिरामध्ये नव्याने बसवलेली 'सूर्यमुर्ती' देखील आपल्याला बघायला मिळते. तसेच सभामंडपामध्ये आपल्याला एक शिवलिंग बघायला मिळते. मंदिराच्या गर्भगृहात असलेले मुख्य शिवलिंग आपल्याला बघायला मिळते. महाशिवरात्रीला 'कुसुमेश्वर' येथे खूप मोठा उत्सव असतो. 

'कुसुमेश्वर' हे मंदिर नक्कीच शिलाहार काळातील असावे हे तेथील प्राचीन विष्णू मूर्तींंवरून समजते. परंतु नव्याने जीर्णोद्धार झाल्यामुळे ह्या प्राचीन मंदिराचे बाकी अवशेष आपल्याला पहायला मिळत नाही परंतु मंदिर हे नक्कीच १० व्या ते १२ शतकातील असावे हे समजण्यास मदत होते. 'कुसुमेश्वर मंदिराचा उल्लेख हा पुराणामध्ये देखील आलेला आहे. 'हरिहरेश्वर' याचा उल्लेख जिथे आपल्याला पुराणामध्ये येतो तेथेच उत्तरेस 'कुसुमेश्वर' वसलेला आहे असा उल्लेख आढळून येतो. 

असे हे प्राचीन 'कुसुमेश्वर' मंदिर ज्या परिसरात वसलेले आहे त्याचा नक्कीच अभ्यास होणे फार गरजेचे आहे. तसेच या 'देवखोल' गावाला प्राचीन शिलाहार काळात काही देणग्या दिल्या होत्या का किंवा या 'देवखोल' गावाचे अथवा 'कुसुमेश्वर' मंदिराचे प्राचीन नाव कोणते होते किंवा त्याचे अजून काही उल्लेख आपल्याला मिळतात का हे नक्कीच अभ्यासणे फार महत्वाचे आहे जेणेकरून या प्राचीन 'कुसुमेश्वर' मंदिराच्या बाबतीत नवीन इतिहास उजेडात येईल. 

निसर्गरम्य 'कुसुमेश्वर' मंदिर परिसरातून आपले पाय नक्कीच निघत नाही. या प्राचीन 'कुसुमेश्वर' देवस्थानी  पवित्र शांततेचा अनुभव नक्कीच येतो. तेव्हा गर्द झाडीत लपलेल्या या 'कुसुमेश्वर' मंदिराला नक्की  भेट देऊन येथील शिल्पांचा अभ्यास करणे फार महत्वाचे आहे. तसेच हे 'कुसुमेश्वर' मंदिर हे विष्णूचे होते कि शंकराचे होते हे देखील बघणे गरजेचे आहे. अश्या या निसर्गरम्य 'कुसुमेश्वर' मंदिराला भेट देऊन आपण नक्कीच एका वेगळ्या ठिकाणाची अनुभूती घेऊ शकतो.