శ్రీ దక్షిణామూర్తి అష్టోత్తర శతనామస్తోత్రం 

మూలమంత్రవర్ణాద్యాత్మకం

శ్రీదేవ్యువాచ -

భగవందేవదేవేశ మంత్రార్ణస్తవముత్తమం 

దక్షిణామూర్తిదేవస్య కృపయా వద మే ప్రభో (1)

శ్రీమహాదేవ ఉవాచ -

సాధు పృష్టం మహాదేవి సర్వలోకహితాయ తే 

వక్ష్యామి పరమం గుహ్యం మంత్రార్ణస్తవముత్తమం (2)

ఋషిశ్ఛందో దేవతాంగన్యాసాదికమనుత్తమం 

మూలమంత్రవదస్యాపి ద్రష్టవ్యం సకలం హి తత్ (3)

ధ్యానం -

భస్మవ్యాపాండురాంగః శశిశకలధరో జ్ఞానముద్రాక్షమాలా-

 వీణాపుస్తైర్విరాజత్కరకమలధరో యోగపట్టాభిరామః 

వ్యాఖ్యాపీఠే నిషణ్ణే మునివరనికరైః సేవ్యమానః ప్రసన్నః స్వ్యాళః కృత్తివాసాః సతతమవతు నో దక్షిణామూర్తిరీశః (4)

ఇతి ధ్యాత్వా మహాదేవం మంత్రార్ణస్తవముత్తమం 

జపేత్ త్రిసంధ్యం నియతో భస్మరుద్రాక్షభూషితహ (5)

ఓం ఓంకారాచలసింహేంద్రః ఓంకారధ్యానకోకిలః 

ఓంకారనీడశుకరాడ్ ఓంకారార్ణవకుంజరః (6)

నగరాజసుతాజానిర్నగరాజనిజాలయః 

నవమాణిక్యమాలాఢ్యో నవచంద్రశిఖామణిః (7)

నందితాశేషమౌనీంద్రో నందీశాదిమదేశికః 

మోహానలసుధాసారో మోహాంబుజసుధాకరః (8)

మోహాంధకారతరణిర్మోహోత్పలనభోమణిః 

భక్తజ్ఞానాబ్ధిశీతాంశుః భక్తాజ్ఞానతృణానలః (9)

భక్తాంభోజసహస్రాంశుః భక్తకేకిఘనాఘనః 

భక్తకైరవరాకేందుః భక్తకోకదివాకరః (10)

గజాననాదిసంపూజ్యో గజచర్మోజ్జ్వలాకృతిః 

గంగాధవలదివ్యాంగో గంగాభంగలసజ్జటః (11)

గగనాంబరసంవీతో గగనాముక్తమూర్ధజః 

వదనాబ్జజితాబ్జశ్రీః వదనేందుస్ఫురద్దిశః (12)

వరదానైకనిపుణో వరవీణోజ్జ్వలత్కరః 

వనవాససముల్లాసో వనవీరైకలోలుపః (13)

తేజఃపుంజఘనాకారో తేజసామపి భాసకః 

తేజఃప్రదో వినేయానాం తేజోమయజనాశ్రయః (14)

దమితానంగసంగ్రామో దరహాసజితాంగనః 

దయారససుధాసింధుః దరిద్రధనశేవధిః (15)

క్షీరేందుస్ఫటికాకారః క్షీణేందుమకుటోజ్జ్వలః 

క్షీరోపహారరసికః క్షిప్రైశ్వర్యఫలప్రదః (16)

నానాభరణముగ్ధాంగో నారీసమ్మోహనాకృతిః 

నాదబ్రహ్మరసాస్వాదీ నాగభూషణభూషితః (17)

మూర్తినిందితకందర్పో మూర్తామూర్తజగద్వపుః 

మూకాజ్ఞానతమోభానుః మూర్తిమత్కల్పపాదపః (18)

తరుణాదిత్యసంకాశః తంత్రీవాదనతత్పరః 

తరుమూలైకనిలయః తప్తజాంబూనదప్రభః (19)

తత్త్వపుస్తోల్లసత్పాణిః తపనోడుపలోచనః 

యమసన్నుతసత్కీర్తిః యమసంయమసంయుతః (20)

యతిరూపధరో మౌనీ యతీంద్రోపాస్యవిగ్రహః 

మందారహారరుచిరో మదనాయుతసుందరః (21)

మందస్మితలసద్వక్త్రో మధురాధరపల్లవః 

మంజీరమంజుపాదాబ్జో మణిపట్టోలసత్కటిః (22)

హస్తాంకురితచిన్ముద్రో హఠయోగపరోత్తమః 

హంసజప్యాక్షమాలాఢ్యో హంసేంద్రారాధ్యపాదుకః (23)

మేరుశృంగతటోల్లాసో మేఘశ్యామమనోహరః 

మేధాంకురాలవాలాగ్ర్యో మేధపక్వఫలద్రుమః (24)

ధార్మికాంతర్గుహావాసో ధర్మమార్గప్రవర్తకః 

ధామత్రయనిజారామో ధర్మోత్తమమనోరథః (25)

ప్రబోధోదారదీపశ్రీః ప్రకాశితజగత్త్రయః 

ప్రజ్ఞాచంద్రశిలాదర్శః ప్రజ్ఞామణివరాకరః (26)

జ్ఞానాంతరభాసాత్మా జ్ఞాతృజ్ఞాతివిదూరగః 

జ్ఞానాద్వైతసుదివ్యాంగో జ్ఞాతృజ్ఞాతికులాగతః (27)

ప్రపన్నపారిజాతాగ్ర్యః ప్రణతార్త్యబ్ధివాడవః 

ప్రమాణభూతో భూతానాం ప్రపంచహితకారకః (28)

యత్తత్వమసిసంవేద్యో యక్షగేయాత్మవైభవః 

యజ్ఞాదిదేవతామూర్తిః యజమానవపుర్ధరః (29)

ఛత్రాధిపతివిశ్వేశః ఛత్రచామరసేవితః 

ఛాందశ్శాస్త్రాదినిపుణశ్ఛలజాత్యాదిదూరగః (30)

స్వాభావికసుఖైకాత్మా స్వానుభూతరసోదధిః 

స్వారాజ్యసంపదధ్యక్షః స్వాత్మారామమహామతిః (31)

హాటకాభజటాజూటో హాసోదస్తారమండలః 

హాలాహలోజ్జ్వలగళో హారాయుతమనోహరః (32)

ఇతి శ్రీ దక్షిణామూర్తి అష్టోత్తర శతనామ స్తోత్రం సంపూర్ణం