Një ngjarje e rrallë dhe e mrekullueshme ka ndodhur në Mbretërinë e Bashkuar. Dy vëllezër binjakë janë gëzuar të dy në të njëjtën kohë duke u bërë prindër brenda dy orësh. Kjo është një gjë e veçantë, ku dy binjakë bëhen prindër për herë të parë njëkohësisht.

George Robinson dhe Hayley Bocking mirëpritën djalin e tyre Oliver James të hënën e Pashkëve, pak para Reginald Geoffrey, fëmijës së Joe dhe Ellie Robinson. Dy baballarët, binjakë me njëri-tjetrin, thanë se një gjë e tillë ishte e pabesueshme dhe emocionuese për ta.

Ndërkohë sipas mediave të huaja, mamia Ami Turner i priti të dyja foshnjat në spitalin Mbretëror Worcestershire.

"Stafi i spitalit ishte pak i hutuar me situatën tonë. Ata vazhdimisht na merrnin në pyetje se kush ishim dhe pse ishim atje së bashku. Kur u thamë se ishim vëllezër dhe partneret tona ishin duke lindur, ata ishin të habitur dhe nuk e besonin dot një gjë të tillë", ka thënë një ndër vëllezërit.

Oliver i cili lindi në datën e parashikuar peshonte 3.6 kg ndërsa Reginald lindi pesë ditë pas datës së parashikuar dhe peshonte 3.2 kg.