అయోధ్యరామా
అగణిత గుణధామా
అగస్టైదు నీ కరోనేషన్ (Coronation)
అదిరిపడుతు మరోవైపు కరోనాతో నేషన్
అద్వానీ రాకుండా
అవనిపూజ జరిగింది,
అఖాడాల అలుపెరగని పోరాటం
అగారమై వెలయనుంది
అవతార పురుషుడా!!
అఫీషియల్లీ నువ్విప్పుడు
అయోధ్యాపురవాసివి,
అధికారపుపగ్గాలను అందించే సారధివి
అమాయకభక్తికి, వోట్లకి మధ్య వారధివి
అబలలకీ,
అనాధాశ్రమాలకీ,
అహల్యోద్ధారకా నేటినుండి నీవే దిక్కువి
అవనిజాపతీ!!
అడవుల ఆచ్ఛాదన తొలగిన
అవని కోరుతోంది శరణాగతి.
అష్టకష్టాల బడుగులనీ,
అప్పులపాలైన రైతులనీ
అమరావతి అందని ఆంధ్రులనీ
అయోధ్యరాజా ఆదుకోవాలిక నువ్వే.
అవినీతిని,
అక్రమాల్ని,
అత్యాచారాల్ని,
అరాచకాల్నీ
అరికట్టే బాధ్యత ఇకపై నీదే.
అదేం పాపం!! అంటావా?
అధికారంలో వున్నా,
అప్పోజిషన్లో కూచున్నా,
అసెంబ్లీలొ, పార్లమెంట్లొ
అధిష్ఠానాల కనుసన్నలు దాటి,
అధికారలాలస మించి,
అజెండాలు లేవు మా ప్రతినిధులకి.
అభివృద్ధి ముసుగులో పెరుగుతున్న
అసమతౌల్యం,
అరాచకపు ముద్రవేసి సాగించే
అణచివేత, ఏవీ పట్టవు వారికి.
అబ్దుల్ కలాం కలలు,
అంగారక గ్రహయాత్రలు,
అమెరికాతో దోస్తులు,
అంబానీల ఆస్తులు,
అణుశక్తితొ ఆటలు
అన్నిట్లో ముందున్నా,
అలో లక్ష్మణా!!
అన్నమో రామచంద్రా!!అంటూ
అర్రులు చాచే ఆర్తులకీ కొదవలేదు
అరమర చేయకు, స్వామీ
అర్జెంటుగ ఆదుకొనుమీ
అయోధ్యరామా
అగణిత గుణధామా
అగస్టైదు నీ కరోనేషన్ (Coronation)
అదిరిపడుతు మరోవైపు కరోనాతో నేషన్ *****************************
Related Articles
ఇంతే సంగతులు
