Wasaaradda Waxbarashada iyo Tacliinta Sare ee Dowlad goboleedka Puntland ayaa Maanta oo Arbaco ah si rasmiya u shaacisay in dib loo dhigay Wakhtiga la gelayo Imtixaanka Shahaadiga ah ee Puntland oo horay loo qorsheeyay 30-May 2020.
Qoraal ka soo baxay Xafiiska Wasiirka Waxbarashada iyo Tacliinta Sare ee Puntland Cabdullaahi Maxamed Xassan oo lagu socod-siiyay Maamulayaasha Goobaha Waxbarashada iyo Mas’uuliyiinta heer Gobol iyo heer Degmo ayaa lagu sheegay in Imtixaanka Shahaadiga ah dib loo dhigay lana geli doono 27-June 2020.
Qoraalka Wasiirka ayaa lagu sheegay in kadib Qiimayn lagu sameeyay heerka uu marayo Xanuunka COVID-19 ay suurtagal noqon wayday in Imtixaanka Shahaadiga ah ku qabsoomo Wakhtigii hore loogu qorsheeyay oo ahaa 30-May2020 sidaasi darteedna la go’aamiyay in loo fariisto 27-june 2020.
Wasiirka ayaa ku boorriyay Maamulayaasha iyo Macallimiinta Dugsiyada in ay sii wadaan isticmaalka Hannaanka Waxbarista Casriga ah si ay u dhammaystiraan Manhajka Sannad-dugsiyeedka 2019-2020 islamarkaana ay raacaan Talooyinka Bahda Caafimaadka ee la xiriira ka hortagga Xanuunka COVID-19.
