بناء على طلب المشاهدين - القناة التانية و الفضائية - قررت أنا إيمان الطاهر رئيسة تحرير المدونة - المسماة خواطر فتاة - بأن أقوم بكتابة الموضوع الواقع تحت هذا العنوان و أنا فى كامل قواى العقلية و البدنية و النفسية و العصبية و كل حاجة!! احم
شئ جميل أوى !! قال أنا هكتب و هقول دول ما ينفعوش زوجات - صلاة النبى أحسن - طبعا ً كله متنح !! بس حقيقى ده اتطلب منى تحت بند المعاملة بالمثل !! و انا احترمت الطلب ده و هكتب فيه بكل أمانة و ربنا يقدرنى و صحباتى ما يولعوش فيا !!! احم تانى ربنا يستر
نبدأ بقى ..
شفنا ف الموضوع اللى فات 20 نموذج من الرجال اللى ما ينفعوش ببصلة !! و المفروض إنى أكتب قدهم 20 نموذج برضه من البنات اللى ما ينفعوش ببتنجان !! يا قوة الله و دول أكتبهم ازاى يعنى .. و منين أصلا ً إذا كان البنات زى الملايكة بيسموهم الجنس الناعم أروح أنا و بكل بساطة أقلبهم غوريلا !! طب ده يرضى مين .. شكلى بستعبط عليكم !! .. معلش يا جماعة .. ياللا كلاكيت تانى مرة
شئ جميل أوى !! قال أنا هكتب و هقول دول ما ينفعوش زوجات - صلاة النبى أحسن - طبعا ً كله متنح !! بس حقيقى ده اتطلب منى تحت بند المعاملة بالمثل !! و انا احترمت الطلب ده و هكتب فيه بكل أمانة و ربنا يقدرنى و صحباتى ما يولعوش فيا !!! احم تانى ربنا يستر
نبدأ بقى ..
شفنا ف الموضوع اللى فات 20 نموذج من الرجال اللى ما ينفعوش ببصلة !! و المفروض إنى أكتب قدهم 20 نموذج برضه من البنات اللى ما ينفعوش ببتنجان !! يا قوة الله و دول أكتبهم ازاى يعنى .. و منين أصلا ً إذا كان البنات زى الملايكة بيسموهم الجنس الناعم أروح أنا و بكل بساطة أقلبهم غوريلا !! طب ده يرضى مين .. شكلى بستعبط عليكم !! .. معلش يا جماعة .. ياللا كلاكيت تانى مرة
Related Articles
الراجل يا جماعة عايز ف البنت كل الصفات الكاملة .. ممكن يفصل بنت عند الترزى لانه أصلا مش هيلاقى .. و من ناحية تانية بيكون هو نفسه مفيهوش أى صفة ممكن تعجب أى بنت !! أنصحه ياخد معاد مع الدكتور ده ، ملحوظة : مكان العيادة حديقة الحيوانات و بعدها ع العباسية عدل !! ما علينا
الأولى : دلوعة مامى و بابى .. صفاتها متدلعة ع الآخر
.. مبتقبلش حد يقولها لأ
طلباتها دايما لازم تجاب
حتى لو هيا زعلتك لازم انت اللى تصالحها
يا ويلك يا سواد ليلك لو زعلتها
التانية : مناخيرها ف السما .. صفاتها مغرورة و واخدة قلم جامد !!.. هتكلمك بألاطة ..طبعا ً مستحيل هتقبل ف أى حال من الأحوال انه يتوجه لها أمر أو حتى نصيحة فانسى و خد البنسة
التالتة : مخلوق نكدى .. و ده طبعا ً ما ينفعش ف النوعين الولد و البنت .. يمكن نسيت أذكر النوع ده ف الموضوع اللى فات . الظاهر انه البنات مشهورين بالنكد فافتكرت ده بسهولة !! بس خد ف علمك المرأة بالفطرة مخلوق ضعيف بس لما بتتجنن بتقلب على مخلوق فضائى نكدى !! و بالتالى أحسنلك ما تتجوزش و اقعد اغسل المواعين
الرابعة : روتينية مملة .. حياتها ماشية على نظام متحدد بالساعة و الدقيقة و الثانية !! الأكل بوقت و الحب بمعاد و الخناق طبعا ً يوم الخميس !! المشكلة مش هتكون فيها بس لانها هتمشى النظام ده عليك و على أولادكم و رجلك فوق رقبتك
الخامسة : مدام صايعة .. صفاتها عديمة الأدب .. معندهاش حياء نهائى .. اللى بيمشى ف عروقها ده أكيد مش دم دى صلصة حمرا !! لانه طبعا دم مفيش
السادسة : مادية جدا .. صفاتها طماعة .. ينطبق عليها حديث النبى*ص* فيما معناه انه ما يملاش عين ابن آدم غير التراب
هتبقى كويسة جدا لحد ما تجيبلها كل اللى نفسها فيه و بعديها تلاقيها شخص تانى تماما
عايزة تعيش ف قصر و تلف الدنيا و تملك أحدث عربية و تلبس أشيك لبس مستورد من بره
و تاكل من أغلى أكل و يا ريتها بتشبع !! و طبعا مفيش وسيلة غير الحمار - أيوة اللى هو انت - اللى هيجيبلها كل ده
السابعة : مرات عشماوى .. صفاتها مسيطرة جدا و مسترجلة أو ممكن تقول راجل لابس ست !! كلمتها لازم تكون أول و آخر كلمة ..
هيا صاحبة القرارات طبعا و بالتالى انت طيشة !! و الصنف ده غالبا لو اتجوزته و جيت ف مرة و اعترضت على تحكمها ممكن تحدفك بكباية تضربك بطاسة دا اذا كانت مش عاملة حسابها أصلا ف الأكياس !! انت و نصيبك يعنى
التامنة : عايشة لنفسها .. صفاتها أنانية و همها الوحيد الأزلى سعادة نفسها و بس .. تهتم جدا بشغلها و علاقاتها و بمظهرها بره البيت .. أصحابها و قرايبها و النوادى و الكوافير و أخيرا مسلسلات التلفزيون !! انت فين بقى منها ؟؟؟ ولادها فين بقى منها ؟؟؟ هيا فضيالكوا ؟؟
التاسعة : بالعة راديو .. و ياريته نجوم اف ام .. لأ ده حاجة كده اسبشيال : أهلها و شغلها و الجارة الفلانة و صاحبتها العلانة .. هتحكيلك كل اللى حصل ف اليوم و كل يوم بالتفصيل الممل ، و ابقى خلى طبيب يطمنك على سلامة ودنك
العاشرة : تحفة فنية تتحط ف المعرض .. صفاتها تلفزيون ملون جايب كل القنوات !! مكياج ايه صاروخ ، رموش صناعية ، عدسات جميع الألوان عشان تليق ع الفستان !! ميكروجيبات و كاتتات و مينى حاجات و ابقى ادفع انت بقى لزوم الصيانة !! .. و إن شاء الله تقع الرموش ف طبق الشوربة و تخلى حياتك ملوخية
كفاية عشرة يا جماعة خليكوا كويسين !! و بعدين هو أصلا الولد ببنتين يعنى كده نبقى حققنا العدل ما بينا
فيه عيوب تانية كتير ممكن تقتبسوها من الموضوع اللى فات لانه كله بيكمل بعضه .. و ف الآخر أحب أقول لكل شاب ريح نفسك و طير ع المريخ
عايزاكو تستنونى الموضوع اللى جاى شيق جدا هوا مسخرة بصراحة هعلن فيه الحرب على شباب النص كم !! و ربنا ع المفترى
إيمان
