حجابوں میں بھی تو نمایاں نمایاں
حجابوں میں بھی تو نمایاں نمایاں
فروزاں فروزاں درخشاں درخشاں
ترے زلف و رخ کا بدل ڈھونڈتا ہوں
شبستاں شبستاں چراغاں چراغاں
خط و خال کی تیرے پرچھائیا ں ہیں
خیاباں خیاباں گلستاں گلستاں
جنونِ محبت ان آنکھوں کی وحشت
بیاباں بیاباں غزالاں غزالاں
لپٹ مشک گیسو کی تاتار تاتار
دمک لال و لب کی بدخشاں بدخشاں
وہی اک تبسم چمن در چمن ہے
وہی پنکھڑی ہے گلستاں گلستاں
سراسر ہے تصویر جمیعتوں کی
وہ گیسوئے پرخم پریشاں پریشاں
زمیں تا فلک شام غم کا دھندلکا
محبت کی دنیا ہراساں ہراساں
یہی جذب پنہاں کی ہے داد کافی
چلے آؤ مجھ تک گریزاں گریزاں
فراؔق حزیں سے تو واقف تھے تم بھی
وہ کچھ کھویا کھویا پریشاں پریشاں
فراؔق گورکھپوری
