سُوئے فلک نہ جانبِ مہتاب دیکھنا
سُوئے فلک نہ جانبِ مہتاب دیکھنا
اس شہرِ دلنواز کے آداب دیکھنا
تجھ کو کہاں چُھپائیں کہ دل پر گرفت ہو
آنکھوں کو کیا کریں کہ وہی خواب دیکھنا
وہ موجِ خوں اُٹھی ہے کہ دیوارودر کہاں
اب کے فصیلِ شہر کو غرقاب دیکھنا
ان صورتوں کوترسےگی چشمِ جہاں کہ آج
کمیاب ہیں تو کل ہمیں نایاب دیکھنا
پھر خونِ خلق و گردنِ مینا بچائیو
پھر چل پڑا ہے ذکرِ مئے ناب دیکھنا
آباد کوئے چاکِ گریباں جو پھر ہوا
دستِ رقیب و دامنِ احباب دیکھنا
ہم لے تو آئے ہیں تجھے اک بیدلی کے ساتھ
اس انجمن میں اے دلِ بیتاب دیکھنا
حد چاہیے فازؔ وفا میں بھی اور تمہیں
غم دیکھنے نہ دل کی تب و تاب دیکھنا
احمد فرازؔ
