“Zotei te chu an rawn zin a ni maw? An fa up zawk lah kha a pian hlim bak kha ka hmu ta miah lo a”ka nu Chuan a ti lawng lawng a.

“Nia, an pa training chhung an rawn awm dawn anih hi, keini lah kan khua a lo har bawk nen”Nu Kimi chuan a ti a.

Ka room atangin an thusawi chu ka ngaithla reng a, ka hnathawh lai chu dah meuhin Zotei nu leh ka nu titi chu ka ngaithla ta reng a. A mak a ni, Zotei pawhin fa pahnih lai a nei Tawh a, a upa zawk pawhin school a kal tan ve tawh chu a ni a, kei lah chu tihian ngaihzawng neih leh zai pawh rel loin chhungte hauh ka tawk reng chu a ni si a, mihring hi kan inang lo mang e tih chu ka rilruah a rawn lang nghal a. Ka inngaihtuah fe hnuah ka va chhuak phei a, ka nu te thiandun Chuan Min lo en rual thawt a, fridge-ah tui ka la a, ka in a, ka chezia chu min lo en reng a ni ang chu, ka han hawi chuan khawdang an hawisawn ve ve a. Ka nui suk a, an rin loh lutuk anga thil a kal vang hian mak ti hian min thlir leh thin ni berin ka hria.

“Hruaia, tunlai I va vang ve?”Nu Kimi chuan a han ti a.

“Nia, a tam hleih theih loh a nih hi”ka ti a, ka nui a.

“A zin reng mai tunlai phei chu, a hna hian a zir lo a, kohhranah pawh hian a tam thei lo”Ka nu chuan a lo ti a.

“Hna in a zir miau loh chuan active reng pawh a theih loh alawm”Nu Kimi chuan a ti a.

Ka bike chahbi ka la a, ngawi rengin ka inkhalh chhuak a, kalna tur ka neih pawh ka hre lem lo, ka rilrua a lanna hmun apiang chu ka pan tawp mai a ni. Kan veng field-ah naupangho an lo inkhel laih laih a, ka bike chu ka han hung tha a, ka inkhel ve ta chiam a. Thlan huh dupin ka haw a, ka inbual a, ka chhungten min chik lem lo chu ka lawm ru khawp mai. Chaw kan ei chhunzawm nghal mai a, inkhawm zan a nih avangin ka chhungte pawhin inkhawm an tum leh ngei ka ring. Tlangval naupang zawk zawk ka ni tawh lo bawk a, ka nu leh pa pawhin ka nun zawng zawng min control an tum lem lo. Thu tha erawh min hrilh reng tho a, min hrilh peih na na na chu zawm a mual mual pawh kan nei ve ang. Ka chhungte inkhawm turin an insiam a, keipawh ka room ah lutin computer hmaah ka thu chhunzawm ve nghal bawk a. Ka room kawngka chu a rawn inhawng a, ka nu chu a rawn lut a. Ka thutna bulah chuan rawn dingin ka darah a rawn vuan a, ka thaw chu a hah ve ngawt a.

“Mama, hetianga awm reng tur hi a ni lo asin, Zotei pawhin fa pahnih lai a nei tawh a, engati nge hetia I awm reng bik? Nun thar nena nung a, fa te nena awm diah diah hi I hun ve tawh asin”a ti dam thlap a.

“Nu, min ngaihtuah suh, hetia awm hi ka duhthlanna alawm”ka ti a.

“I tihsual ni bik awm ang taka hetianga a tuartu I ni reng hi hmuh che hrehawm ka tie m a ni”a ti a.

Nu te hi chu an lo danglam ngawt mai, kan inthup viaua kan inhriat lai pawh hian mi hi an lo hre fai kelh ni ber hian a lang a, ka nu pawh hian ka nun dan leh khawsak phungah hian ka rilrua awm turte hi a hre em em a, a chang chuan hre miah lo se tih hi ka duh hial thin. Ka pa in a rawn koh takah chuan min chhuahsan a, biak in lam panin min kalsan ta a. Chu veleh ka khumah chuan ka let tawp a, kum tam tak hnuah ka thinlung na chuan min rawn tuam leh a, engmah tih zai reng ka rel thei lo.

----xxxx-------------------------------xxxxxxxxxxxxxxxxx------------------------

“Lalhruaitluanga leh Zothanmawii te niminah engvanga school rawn kal lo nge innih?”Miss Thari chuan a tarmit karah min rawn melh khui a, Zotei chu ka va melh a, hlauh hmel tak hian min lo melh kar a.

“Ka tho tlai lutuk a”ka ti ta ringawt a.

“I tho tlai lutuk a, school I kal hman lo a, Zothanmawii a kal loh phah ve ringawt a ni maw?”a han ti leh kher a. Ka ngei ru kher mai.

Min thuttir hnu pawh chuan Zotei chu a kun tlat a, a zak hle tih ka hre mai. Kei hian ka tisual let der a ni, a duh lo chung kha lo chhuah pui lo ni ila tha tur ania, ka khawngaih lutuk chu ka inhaw tak zet a ni. School ban pawh chuan min be duh ta miah lo a, kei lah ka inthlahrung lutuk chuan ka pawh ngam bik lo. Bus kan chan lai pawh chuan melh khat pawh min melh lo. Kan veng peng kan thlen chuan kan chhuk a, a hnungah chuan ka zui zel a, a lehkhabu ka hawh chu pek ngei ka duh bawk si, ka be hreh bawk si a, a tawpah chuan ka han ko dek dek a. Ka kohna chu hria ang pawhin a awm lo, ka han tlan deuh a, ka umphak vat a.

“Zote..”

Min rawn melh zawk a, a hawisawn leh nghal a.

“I note ka hawh kha”tih pahin a note chu ka han pe a.

A la a, a kal leh hmawk hmawk a. An in kan thleng tep tawh a, lungawi lo taka han inthlah chu ka hreh khawp mai a. Min biak duh bawk si loh avangin tihngaihna ka hre tawh bawk lo nen chak tak hian ka kal a, ka kal pel ta ringawt a. Kawng kawia ka kal tur chu ka han hawi let a, Zotei chu an step-ah dingin min lo thlir reng a. Chutia ka en tih a hriat chuan rang em em hian inchhungah a lut a, ka nui suk a.

Mipa inti pa ve tawk tak mai, midangin min mamawh lo nia ka hriat chuan engatanmah ngai bik lo hi ka ni ve a, ka tawng tam viau lo a, thian erawh ka ngah ve phian lawi a, thiante tana engkim ka huam thin vang hi a ni maithei, thiantha tia sawi tur ka neih ve nual chhan hi. Ka naupanlai thian Zotei erawh kan han tleirawl tan a, kan inkawm tam lutuk thei ta lo. Hmundangah a pite bulah te a han awm ren rawn a, pawl sawm kan nih kum erawh chuan Aizawlah a rawn let leh a, kawm tur a neih lutuk loh avang leh kan school a thuhmun avang hian kan inkawm veleh chauh a ni. A hma nia school kal loa ka hruai chhuah chhan pawh ka bialnu nen inhmuh kan inngai a, hmeichhe telloin an school ah mipa kal an phal loh avangin Zotei chu hmanruaah ka hmang a ni. Keimah vangin zahna a tawk chu ka rilru a nuam chiah bik lo a, mahse, a lungawi lohna sawi mai tur anih laia min be duh lo ringawt chu ka ngaihdan a ni tehchiam lo. A tukah pawh ka sawm duh ta lo a, school ka thlen chuan ka zawng rilru deuh a, ka hmu ta mai lo. Class kan tan a, a rawn lang ta lo fo, ka rilru chu a nuam chiah tawh lo. Roll call laiin a rawn lut a, a hmel ka han en chuan a sen deuh tan a, a hah hle anih ka ring, a thut hnu thlengin ka enzui a, vawikhatmah min rawn melh lo. Lunch break laiin ka zawng ru deuh reng a, a tawpah section dang ami nen ka hmu tlang a, a mipa zawk chuan eng emaw hi a sawi a, Zotei chu a nui san san a, hmuh nuam ka tih loh vangin ka hawi sawn ta ringawt a. Chumi ni atang chiah chuan mak deuh mai hian Zotei chu ka thiannu ang ngawt chuan ka en thei dawn ta lo tih ka hria. Tlai banah kan haw rual a, min la hua em tih hriat tumin ka han bia a, tha deuhin min chhang a, min haw tawh lo anih ngei hi ka ti rilru a, ka lawm khawp mai. Bus atangin kan chhuk a, kan inzui dun leh ta hnak hnak a.

“Engati nge vawiin kha I rawn tlai a?”ka tih chuan min melh zawk a.

“Ka nghak che a”a ti a.

“Pawi ka ti lutuk aw, min kalsan daih tawh ka ring a”ka han ti ve a, keimah vanga a tlai chu pawi ka ti tak zet a ni.

“A ho lutuk”a ti a, min nuih ta ver ver a.

“Hruai, thil hrilh tur che ka nei asin”a tih chuan ka thin chu a phu deuh nghal dep dep a.

“Han sawi la”ka ti a.

“Section C ami Mawipuia khan min bem a, engtinnge ka tih ang?”a ti a.

Ka ngawi ta reng a, amah ka ve en chuan min lo en ve reng a.

“Ngaihzawng neih a ngai lo”ka ti ta ringawt a.

“Nangpawhin I nei tho alawm”a ti sep a.

“Mipa leh hmeichia an inang hleinem”ka ti vat a, min chhang tawh lo.

An in bul kan thlen chuan a kut chu ka han la a, min en deuh ha a, “Nakumah chiah ngaihzawng chu nei rawh”ka ti a, a nui ta hak a.

Kawi ka thlen chuan ka hawi leh kher a, Zotei chuan min lo bye lauh lauh a, ka han vai let a, ka nui ta var var a. Zanah chuan lehkha ka zir thei lo, ka rilruah Zotei chiah a awm a, min ngaih ve dan tur ka hre lo, mahse, ka thu a awih ringawt pawh chuan min tilawm a ni.

School games tan a ni leh tawh a, kan school tawiawm turin keini pawh kan kal a ngai a, bialnu ka lo neih ve khanglan avangin inzui a lo beisei ve bawk nen, Zotei chuan kan inzui thei ta lo. Nithum chhung zet kan inhmuh loh hnuah lammualah kan inhmu ve ta hlawl a, Mawipuia leh a thiannu pakhat ka la hriat loh nen an pathumin kan hmaah an thu a, amah phei chuan min rawn hmu ve lo. In close hmel taka Mawipuia nen an inbia a, an nui vel chuan ka mit a tikham hle a, pawh nawk nawk a, kal pui daih chu ka chak a, mahse, a rem si lo. Ka nawm loh chhuanlamin haw ka rawt a, ka bialnu pawh chuan min hnial lem lo, kan haw ta daih a. In ka thlen hnu pawh chuan ka rilru chu a tawt ut ut hian ka hria, Zotei nui hmel ringawt chu ka mitthlaah a cham a, ka thiannu a ni alawm tiin ka inhrilh mawlh mawlh a.

Class pangngaiin kan kal leh tawh a, kan kal lamah hi chuan Zotei nen chuan kan kal tlang a, haw lamah erawh Mawipuia’n bike in a phur haw thin. Selection exam kan han nei a, lehkha zir aia Zotei ka ngaihtuah tamna chuan min fail tir chiang khawp mai. Private-a exam form fillup ai chuan tiin school dangah ka insawn a, regular a exam theihna kha ka duh vang a ni. Nikhat chu ka nawm vak loh vangin school ka kal lo a, inah keimahin ka awm a, ka rin loh deuh hian Zotei a rawn hlawl mai a. An in kawngah ka kal ngai loh vangin kan inhmu khat khawp a, biak ina kan inhmuh bak kan inhmu lem lo a ni.

“Eng nge I rawn tih dawn teh mial a?”ka lo ti a.

“I nu in I dam lo tih a sawi a, ka ngaihtuah deuh che a”a ti mai a.

“Anih chu, I van fel ve. Hei ka tha lutuk. Tinge I kal loh zawk a?”ka ti a.

“Study leave a ni tawh a”a ti a, kan plant chu a zut dalh dalh a.

“Hruai, tinge school dangah I kal kher a?”a tih chuan ka tv en lai chu ka han hmet tawp a.

“A zahthlak alawm, ka fail chiang ropui si”ka ti a.

“I fail chhan pawh kha ngaihzawng I neih vang nih kha”a ti a, a nui deuh a, ka lo tum hmak vang chuan a nui ngam ta lo a.

“Sport zawh atang khan ka nei tawh lo hrim hrim”ka tih chuan awih loh hmel deuh hian min en a.

“Tinge I fail si?”a ti leh mauh a.

“Mi pakhat vei deuh ka nei a, ani lah chuan midang a nei bawk sia, ka lo la na deuh a ni ang”ka ti a.

A kut chu a khal neuh neuh a.

“Tunge ka hria ang em?”zam aw lek lek hian a ti a.

“I inhria emaw ka ti a”ka tih chuan min en rang kher mai.

A ding uai a, ka ding ve nghal a, ka sawi sual ta em ni ka ti hial a, ka inchhir hman khawp mai.

“Min bawl kual reng lo tehh”a tih chuan ka thaw hawk a.

“Thu la, ka hrilh ang che”ka tih chuan a thu veleh mai a.

A lakah ka rilru zawng zawng chu ka hrilh ta vek a, ka sawi chhung zawng chuan min lo en reng a, Mawipuia nen an chungchang ka sawi lai chuan a nui ta hak a.

“Eng nge a nuihzatthlak vak mi?”ka ti a.

“Mawipuia’n a thik turin awm rawh a tia nih kha”a tih chuan ka kuah a, engmah sawi belh a ngai lo tih ka hria.

Chumi ni atang chuan kan inhmangaihna bul kan tan ta nih kha. Tleirawl mai kan la ni a mahse, kan rilru erawh a nghet em em a, khawdang kha kan hawi thei lo a ni ber.

----------------x--------------------------x-----------------------------x------------

Office kal turin ka insiam a, zan lama ka men rei em avangin ka lu chu a rit bur mai. Ka nu chuan thleng a lo sil mawlh mawlh a, ka pa pawh a hna lamah a kal tawh anih hmel, a hmel hmuh tur a awm tawh lo.

“Kan tlangval lahin nupui neih zai a rel thei silo, thleng sil hi awl kan chak ve tawh asin mawle”ka nu chuan a lo ti a. A sawi zin ber thil anih avangin engahmah ka ngai lo. Helmet leh chahbi ka la a, ka tiffin ka nu in a lo thun fel diam tawh chu la in ka ak a, ka chhuak nghal a. Ka nu chuan a tihdan pangngaiin min thlir liam a, ka liam hnuah a hna a chhunzawm chauh ang. Nilengin zan lama ka thil ngaihtuah chhuah avang chuan ka awm a nuam lo. KA hun liam tawh leh hun kal tawh ka ngaihtuah lohna pawh a rei tawh nen, engmah ka thawk tui thei tak tak lo.

Chawhnu lamah file khawih tur ka ngah deuh nen ka lo thawk tui veleh phian a, ka zawh fel meuh chuan ban a lo hun ve der tawh. Ka thiante pawh haw tumin an lo phi sang sang a, muangchangin ka indah fel a, ruah chu a tla deuh siap siap a, bus a haw tur leh car nei ho an kal zo a, tlemte chiah kan bang tawh. A tla tam lo bawk a tiin haw chu ka tum a, chutih lai chuan ka nu in min rawn phone a, ka nau fapa birthday a lo ni reng chu niin, an in lamah chawei tur kan nih thu min rawn hrilh a, ka chak lem lo viau na a ka nau thinrim ka hlauh vangin kal chu ka tum ta zawk a. Ruah chu ka do ta zel a, atam lutuk lo a, ka thawmhnaw erawh a ti hnawm tawk viau tho. Naupang thawmhnaw dawrah lutin naute thawmhnaw tur chu ka han lei kawi a, ka nau te in ka thlen chuan ka tlai lek lek tawh hi a lo ni a. Hunserh an lo hmang zo tawh a, keipawh ka present ken chu ka nau pek pahin naute chu ka han pawm a. Ka nau Awmawmi chuan min kheuh zeuh a, en tura min tihna lam ka en chuan Zotei chu kan thlang lawkah a fapa pawmin mi pakhat nen an lo inbe mawlh mawlh a, ka hawisawn vat a. Chawei an siam chhunzawm nghal bawk nen ka kalsawn ta a. Awmawmi te room-ah ka lut a, ka thin phu dep dep chu ka han khawih a, engati nge ka la danglam ve theih miah loh? Tukverh chu ka han hawng a, ral lehlam chu ka hawi vang vang a, rilru thar put hi a hun tawh tih ka hria, mahse, engati nge min tina em em tu hi ka thinlungah hian a lal em em? Hei hi a ni vawiin ni thlenga midang nei thei loa min siamtu chu, zial chu ka zu vang vang a, ka awmrei chu a dik ka tih loh vangin chaw dawh ve tur chuan ka chhuk ta a.

Ka chaweikham haw mai tura ka inpuahchah lai chuan kan nau pakhat hian min lo ko a, ka va hawi chuan Zotei nen an lo ding tlang reng a, chiang tak hian Zotei pawh chuan min lo melh ve reng a. Ka mit chu lasawn hmasatu nih ka tum lo, amah zawk chuan a la sawn ta nge nge a. Ka bike awmna lam ka pan lai chuan ka tukhum chu a za deuh mer mer hian ka hria, ka bike sideglass a ka en chuan Zotei chuan min lo la en reng a, a fapa a tah takah chuan awi darh darh chungin a kal sawn a, ka thaw tha thei lo mai dawn hian ka hria, chak takin ka tlan haw ta vang vang a.

Ka inthlak sawk sawk a, kawnghnuai lamah kalin Zotei huan mawngah chuan ka lut chho a, hnahthel chu ka hai sawn mawlh mawlh a, ruah tla khan a tih hnawn avangin ka pheikhawk te pawh chu a berh phung a, ka pawisa lo. Lung ka phun chu ka han hai fai a, kraws ka ker chu ka han tifai a, khua a thim tawh avangin a hmuh that theih tawh lo. Ka phone chu ka han ti eng a, chiang takin kraws chu a rawn lang ta ve ve a. Ka mittui chu a rawn tla a, au chhuah vak vak chu ka duh a, ka thawm an hriat ka duh bawk si lo. Ka thu sawp niai a, kan fa hi lo dam se chuan tunah hian a lian tawh awm si a, a rual pui tur angte chu ka mitthlaah an rawn lang zut zut a, thinlung na em em chulai hmun chu ka kalsan leh ta a. Ka haw chu ka chhungte an lo haw tawh a, ka pheikhawk berh phung an hmuh chuan mak ti deuh hian min en a, mahse, engmah an sawi lo. Ka inbual a, ka zawh chuan chuan engmah ka ti peih lo, ka mu a, ka muhil lo.