රටක් බය කර රනිල් වික්‍රමසිංහට පුටුව රැක ගැනීමට නොහැකි බව ජාතික ජන බලවේගයේ නායක අනුර කුමාර දිසානායක පවසනවා. ඔහු මේ බව කියා සිටියේ පාර්ලිමේන්තුව විසුරුවන ලෙසත් නව ජනවරමකට ඉඩදෙන ලෙසත් ආණ්ඩුවට බල කරමින් අරගලයේ ජන බලය නමින් ජාතික ජන බලවේගය රැලියට අමතමින්.
”අපි දන්නවා අද අපේ රටේ ගොඩනැගිලා තිබෙන්නේ ජන වරමක් නැති ආණ්ඩුවක්, ජනවරමක් නැති නායකයෙක්. ඒ වගේම අපේ රටේ ආර්ථිකය ගොඩනැන්වීමට සමත්, වැඩපිළිවෙලක් හෝ දැක්මක් නැති පාලකයන් පමණක් නොවෙයි අපේ රටේ ආර්ථිකය විනාශ කරපු කණ්ඩායම. දූෂණය, වංචාව පෙරදැඩිකරගත්ත කණ්ඩායමක්. ඒ නිසා මේ රටේ ජනතාවට ශුද්ධ වූ සාධාරණ අයිතියක් තිබෙනවා, එම පාලනය පලවා හැරීම සඳහා ජනතාව පෙරට එන්න. මේක පලවා හරින්න ඕනා.
පහුගිය කාලේ අපි කාටත් ආශ්වාදයක් උත්තේජනයක් ගෙනාපු මහා දැවැන්ත ජනතා නැගිටීමක් සිද්ධ වුණා. රට පුරා විවිධ ක්ෂේත්‍රවලය අටත් ජන කණ්ඩායම් පාරට බැහැලා පැවති පාලනය පලවා හරින්නත් ජනතාවට තමන්ගේ ගැටළු විසඳන ජනතා පාලනයක් වෙනුවෙනුත් අරගල කළා. මෑත ඉතිහාසයේ ලංකාවේ සිදු වූ දැවැන්තම ජන පෙලගැස්ම අපි පමුගිය මාස දෙක තුන ඇතුළේ දැක්කා. එම අරගලය සමත් වුනා රාජපක්ෂ කඳවුර ඉවත් කරන්න. එහෙත් ඉතුරුවූ කඳ විසින් රාජපක්ෂ කඳවුරට අලුත් හිසක් සවි කළා ඒ තමයි රනිල් රාජපක්ෂ හිස.
දැන් ලබන සතියේ ඇමතිවරු රොත්තක් දිවුරුම් දෙන්න නියමිතවෙලා තිබෙනවා. අමතර තනතුරු පිරිනමමින් ජනතාවගේ මුදල් කෝටි පකෝටි ගණනින් නාස්ති කරමින් තමයි ඒ කඳවුර රඳාපවතින්නේ. එක්සත් ජාතික පක්ෂයේ පාර්ලිමේන්තුවේ හිටියේ එක්කෙනයි. පහුගිය පාර්ලිමේන්තුවට ඉදිරිපත් වෙච්ච ඕක්කොම පැරදුනා. දැන් පැරදුන අය අන්න කඳවුරේ. තමනුත් තමන් වටේ ඉන්න අයටත් වරදාන වරප්‍රසාද පිරිනමින් ඉන්නවා. ඊලඟට රනිල් වික්‍රමසිංහ කල්පනා කරනවා තමන්ගේ පැවැත්ම රඳාපවතින්නේ මර්දනය මත කියලා.
ඉතිහාසය අවසන් වෙලා රනිල් දැන් දශක ගණනාවක් ගතවෙලා ඉවරයි. තවදුරටත් රටක් බය කරලා, භීතියට පත් කරලා, සමාජ ක්‍රියාකාරීන් මර්ධනය කරලා, දේශපාලන ක්‍රියාකාරිකයින් මර්දනය කරලා රනිල් වික්‍රමසිංහට පුටුව ආරක්ෂා කරගන්න පුළුවන්ද. ඒව ඉතිහාසය.” යැයි ජාතික ජන බලවේගයේ නායක අනුර කුමාර දිසානායක කියා සිටියා.
