मुंबई : अधिवक्ता गुणरत्न सदावर्ते यांचा परवाना दोन वर्षांसाठी निलंबित करण्यात आला आहे. वकिलांच्या गणवेशात धरणे आंदोलनात सहभागी होऊन वकिलांच्या आचारसंहितेचा भंग केल्याप्रकरणी महाराष्ट्र आणि गोवा बार कौन्सिलने सदावर्ते यांच्यावर ही कारवाई केली आहे.

गुणरत्न सदावर्ते यांना दोन वर्षे कायद्याचा सराव करता येणार नाही किंवा कोणत्याही न्यायालयात कोणाचेही प्रतिनिधित्व करता येणार नाही. वकिलांसाठी आचारसंहिता आहे, त्याचे उल्लंघन झाल्याची नोंद करण्यात आली आहे. वकिलाच्या वेशात सार्वजनिक ठिकाणी प्रदर्शन केल्याचा आरोप त्यांच्यावर आहे. त्यामुळे सदावर्ते यांच्यावर शिस्तभंगाची कारवाई करण्यात आली आहे.

दोन तक्रारी दाखल झाल्या

गुणरत्न सदावर्ते यांच्याविरुद्ध दोन तक्रारी दाखल झाल्या होत्या. पिंपरी-चिंचवडमध्ये आंदोलन केल्याप्रकरणी त्यांच्यावर कारवाई करण्यात आली आहे. बार कौन्सिल ऑफ महाराष्ट्र आणि गोवाच्या कारवाईला गुणरत्न सदावर्ते आव्हान देणार आहेत.

यापूर्वी उच्च न्यायालयाकडून दिलासा मिळाला नव्हता

नुकतेच मुंबई उच्च न्यायालयाने सदावर्ते यांच्यावरील बार कौन्सिलच्या शिस्तभंगाच्या कारवाईला स्थगिती देण्यास नकार दिला आहे. केवळ वकील असल्याने त्याला विशेष वागणूक देता येणार नाही, असे उच्च न्यायालयाने म्हटले आहे.