मुंबई : मध्य रेल्वेच्या मशीद ते सँडहर्स्ट रोड स्थानकादरम्यान ओव्हरहेड वायरवर अचानक बॅनर पडल्याने डाऊन स्लो मार्गावरील लोकलची वाहतूक सुमारे अर्धा तास विस्कळीत झाली होती. यावेळी दोन्ही गाड्यांचे गार्ड व मोटरमन यांनी दाखविलेल्या सतर्कतेमुळे अपघात टळला व कोणतीही हानी झाली नाही.

सीपीआरओ शिवाजी सुतार यांनी सांगितले की, बुधवारी सकाळी 10.58 वाजता ही घटना घडली. सीएसएमटीहून डोंबिवलीच्या दिशेने जाणाऱ्या लोकल ट्रेनच्या गार्डने ठाण्याच्या बाजूने येणाऱ्या लोकल ट्रेनचा फ्लॅशर लाईट पाहून लोकलचा वेग कमी केला. ठाण्याकडून येणाऱ्या लोकलचा मोटरमन व्ही.एस. जकाते यांनी डाऊन लोकलच्या मोटरमनला सांगितले की, समोरील ओएचईवर मोठा बॅनर पडला आहे. मोटरमन पी.एस. सपकाळ यांनी गाडी थांबवली.

डाउन लाइन प्रभावित

रेल्वे कर्मचाऱ्यांनी घटनास्थळी पोहोचून ते बॅनर हटवले. यादरम्यान सुमारे अर्धा तास डाऊन मार्गावर परिणाम झाला. लोकल ट्रेन पुढे सरकली असती तर ओएचईवर बॅनर पडल्याने 25 हजार बोल्टची विद्युत तार तुटली असती, या संभाव्य अपघाताने लोकल गाड्यांचा तासभर खोळंबा झाला असता, असे सांगण्यात आले.

होर्डिंग एजन्सीला नोटीस

रेल्वेच्या बाजूचे होर्डिंग तुटून ओएचईवर पडले त्या एजन्सीला नोटीस बजावण्यात आल्याचे सांगण्यात आले. रेल्वे रुळाजवळ अनेक ठिकाणी मोठमोठे होर्डिंग्ज लावण्यात आले आहेत. मुसळधार पाऊस आणि वाऱ्यामुळे हे बॅनर ओएचईवर येतात, त्यामुळे अपघाताची शक्यता वाढते.