انسان کی سانس روک لی جائے تو وہ چند ہی منٹ میں دم گھٹنے سے مر جائے گا۔ اس سے ہمارے اردگرد موجود ہوا، جس میں ہم سانس لیتے ہیں، کی اہمیت کا اندازہ ہوتا ہے۔ لیکن ہماری ہوا بہت آلودہ ہو چکی ہے اور مزید ہوتی جا رہی ہے۔ ہوا کی حالت کے بارے میں شائع ہونے والی ایک تازہ رپورٹ میں کہا گیا ہے کہ دنیا کی 95 فیصد آبادی جس فضا میں سانس لے رہی ہے وہ غیر صحت مندانہ ہے۔ رپورٹ کے مطابق فضائی آلودگی کی وجہ سے دنیا میں 2016ء میں 61 لاکھ اموات ہوئیں۔ رپورٹ کے مطابق فضائی آلودگی امراض قلب، دل کے دورے، پھیپھڑوں کے مہلک امراض بشمول کینسر اور قبل از وقت اموات کی وجہ ہے۔ 

رپورٹ میں یہ بھی کہا گیا ہے کہ عالمی سطح پر بلند فشار خون (ہائی بلڈ پریشر)، خوراک اور تمباکو نوشی کے بعد صحت کو سب سے زیادہ خطرہ آلودہ فضا سے ہے۔ یہ رپورٹ ہیلتھ ایفکٹ انسٹی ٹیوٹ نے شائع کی ہے۔ انسٹی ٹیوٹ کے نائب صدر نے ایک بیان میں کہا ہے کہ فضائی آلودگی کی وجہ سے بالخصوص نظام تنفس کی بیماریوں میں مبتلا افراد کو سانس لینے میں مشکلات ہوتی ہیں۔ نتیجتاً چھوٹے بڑے تمام متاثرہ افراد کو ہسپتال جانا پڑتا ہے جس سے ان کے سکول اور کام کا حرج ہوتا ہے۔ 

ان کے مطابق دنیا کے کچھ حصوں میں اس حوالے سے صورت حال بہتر ہو رہی ہے لیکن عالمی سطح پر اس سے نجات ایک حقیقی چیلنج ہے۔ رپورٹ کے مطابق دنیا میں فضائی آلودگی سے ہونے والی نصف کے قریب اموات چین اور بھارت میں ہوتی ہیں۔ رپورٹ میں بتایا گیا ہے کہ چین نے فضائی آلودگی کو کم کرنے میں قدرے کامیابی حاصل کی ہے لیکن 2010ء کے بعد پاکستان، بنگلہ دیش اور بھارت میں فضائی آلودگی میں بہت اضافہ ہوا ہے۔ عالمی ادارہ صحت نے گزشتہ برس اپریل میں کہا تھا کہ ماحولیاتی آلودگی سے پانچ سال سے کم عمر کے اندازاً 17 لاکھ بچے سالانہ ہلاک ہو رہے ہیں۔ ایک اور تحقیق کے مطابق 2015ء میں ہر چھ میں سے ایک، یعنی نوے لاکھ افراد آلودگی کی کسی نہ کسی شکل سے موت کے منہ میں چلے گئے۔ اس میں فضائی آلودگی، پانی کی آلودگی، کیمیائی آلودگی وغیرہ شامل ہیں۔ رپورٹ کے مطابق کم اور درمیانی آمدنی والے ممالک میں فضائی آلودگی سے اموات کی شرح زیادہ ہے۔  

ترجمہ و تلخیص: رضوان عطا